Al rey de Valençia enbiaron con mensaie,
Que a vno que dizien Myo Çid Ruy Diaz de Biuar,
Ayrolo el rey Alfonsso, de tierra echado lo ha.
Vino posar sobre Alcoçer en vn tan fuerte logar.
Sacolos a çelada, el castiello ganado a.
Si non das conseio, a Teca e a Teruel perderas;
Perderas Calatayuth que non puede escapar:
Ribera de Salon todo yra a mal.
Assi ffara lo de Siloca que es del otra part.
Quando lo oyo el rey Tamin por cuer le peso mal.
Tres reyes veo de moros derredor de mi estar.
Non lo detardedes, los dos yd pora alla.
Tres mill moros leuedes con armas de lidiar
Con los de la frontera que uos ayudaran.
Prendet melo a uida, aduzid melo deland:
Porque se me entro en mi tierra derecho me aura a dar.
Tres mill moros caualgan e pienssan de andar.
Ellos vinieron a la noch en Sogorue posar.
Otro dia mannana pienssan de caualgar.
Vinieron a la noch a Çelfa posar.