So, jetzt muss ich mo dringend nommo was schreiwe, damit die Paus net üwwahand nemmt.

Also ledschdes Wochenenn ware ma Donnerschdach bis Mondach uff nem [Acro Yoga Festival][unity]. Bilder hamma leider kaum, weil es Handy meischdens im Zelt lag. Enns gebt's von dem dolle Fluss, der direkt am Zeltplatz vorbeilief; so klar unn erfrischend.

Von der Brick, die ma im Hinnergrund sieht konnt ma nadierlich runnerspringe. Unnedrunner hodde se bestimmt 10 Ringe uffgehängt, so dass ma scheen affeschwinge mache konnt.

Daachsüwwa gab's jeweils 3 Lehrgäng, immer 2 Stunn lang. Do war ma meischd echt schommo ganz scheen platt devon. Omends hat dann immer noch e DJ uffgeleht. Während die halb Hall weitergeiebt hat, hat die anner Hälft abgedanct.

Das war schon werklich sehr sehr sehr scheen dort. Net nur Fluss unn Wetter, ach die Leit, die ma dort getroff hat. Ganz viele besonnere unn liewe Leit, die enfach alle Spaß gehatt hann.

E paar von dene sinn ach __richdich gudd__ in diverse Sache. Also was die an Vorführunge omends gemacht hann, die kennte genau so gudd bei Cirque de Soleil gewehn sinn.

[unity]: https://www.ayunityfest.com/