Saarlänner in Wängkuwer @primfaktor@qoto.org

Unn es ledschde Wochenenn, also um de 19. Auguschd, war eigentlich dodal warm gemellt.

Weil die Sonn awwa durch die Rauch net werklich durchkomm iss, war's in Werklichkät kalt – zu kalt für Strand, uff den ma uns so gefreit hodde.

Wer sich froht, wie die [Waldbrände](https://www.tagesschau.de/wissen/klima/waldbraende-kanada-klimawandel-100.html) sich für uns in Vancouver auswirke, der kann sich mol die Bilder do aangugge.

Unn es nägschde Feuer iss üwwa 100 km weit weg…

Im April hamma dann Tanja & Sasha besucht, die lusticherweis e zimmlich ähnlichie Storie wie mir hann.

1. Antrach gemacht im Urlaub in Italie
1. anstehende Jobchance in Nordamerika
1. schnell noch Heirate in Deitschland
1. auswannern zu zwoot

Die sinn da USA gelandt, in LA um genau ze sinn.

Im April ware ma für faschd 2 Woche dort, unner da Woch hann ich remote geschafft. Deren wutzdeirer Gebäudekomplex hott zimmlich gudde (mehrere) Coworking-Räume.

Scheen war, dass LA viel südlicher iss, mir also schommol e frühres Stick Sommer kritt hann, Bissje Strand, wannere unn flaniere.

Besonnerschd scheen ware die [botanische Gärte](https://goo.gl/maps/o1PLac3S99VTwci27), die ma besucht hann. Die Kackteejelandschaft war werklich cool, ganz was anneres mol. Am zwootbeschde hann ma die Urwälder gefall.

Unn noch was Aktuelles dezu. Heit hann ich mei Faschdewoch gebroch. Heit Middach nur 2/3 Abbel unn heit Omend mei Brot. 🤤

Endlich mol widda anfegang dodemit, es ledschde mol war in Deitschland.

Ich hott schon angefang, e Starter selbschd ze züchte, awwa das hätt mich noch gudd e Woch koschd. Echte Bäckereie gebt's jo hier net, also ach nix, wo ma sich e Starter ergaunere kann.

Dann hann ich awwa uffm Weech zur Arwid zwä Köch vom [VCC](https://goo.gl/maps/KnH1L7v3ZmNgPGnA7) drauße raache gesiehn; e Englänner unn e Ire. Unn siehe da, stellt sich raus ihr Kolleech is Deitscher unn backt Sauerdeich. Zehn Minudde später hott ich e Gläser Starter – 4 Johr alt!

Je älder die Kultur iss, desto meh Geschmack hasche hinnerher im Brot. Unn jo, es __iss de Hit!__ Unser [Mexikanerfreund](https://qoto.org/@primfaktor/110557611681495060) (mit em gleiche Unnerlippezeiche wie ich) hat so Brot glaawich noch nie gess (ach net gehob 😆). Dem sinn Geschmacksnerve aus de Aue rauskomm.

Dann noch was für de Februar: Strand unn Schnee zur gleich Zeit! Do hann ich üwwa verzich Johr warte misse um das ze erläwe.

Das iss üwwarichens [Wreck Beach](https://goo.gl/maps/kcyGAoLMM6F2CchC8), unser Lieblingsstrand, welcher ach de enzichde FKK-Strand iss.

So! Hann ich jo mol gudd geblogt im Johr 2023, ne?!?

Ich schieb's mol uff Amazon unn die Angschd im Januar rausgeschmiss ze genn unn gleich widda hemmfliehe ze misse.

Fange ma doch mol im Februar an, mit unsrer klän Neonparty hier bei uns. Net so aarich viel Leit, awwa hodde die ein Spass – vor allem mim anmoole.

Dange übrigens ans Antje, dass es mich hierfür nommol angestuppst hat.

So unn jetzt endlich ach Bilder vom Skifahre. Nummer zwä war nämlich dann scheen, __so scheen!__

Bissje frieher Schluss gemacht so dass ma glaawich um 3 owwe ware. Erschdens war das vom Betrieb her _viel_ besser unn zwootens gab's dann enfach mol de geilschde Sonneunnergang mit Schnee unn Ozean. War mit änem von dene, die leider nimmeh bei uns schaffe, allän unnerwegs.

Am 29. Januar hamma e Schneeschuhwannerung mache wolle. Schneeschuh ze organisiere hamma net hinkritt, also sinn ma mit normale Schuh gang. Für de Großdäl vom Weech ging das ach gudd, nur es ledschde, steilschde unn rutschichste Stick hamma ausgeloss.

Eddie war mit uns mit, nohdem sei Freund Sandun abgesprung iss.

Anstrengend schon, awwa die Aussicht belohnt. Übrigens aach [widda](https://qoto.org/@primfaktor/109853786143390752) Cypress Mountain, awwa an na anner Seit, dort wo ach die Langläufer fahre.

Unn so hamma Silveschda gefeiert. Zeerschd sinn ma zu na [Decentralized Dance Party](https://theddp.com/) die so geje die deire Discos stehn will, wo ma erschd emol e Haufe Geld zahle muss um üwwahaupt rinzekomme.

Das war zimmlich witzich, mit Stimmungsmacher vorne unn erschd mol nur e Handvoll Leit, die beim gehampel mitgemacht hann. Noh zwei Stunn ware's awwa hunnerde.

Denoh sinn ma zu uns hemm wo ma _richdich gudd_ ringerutscht sinn.

Unerwarteterweis so gudd wie gar kä Knaller odda Rakete geheert/gesiehn.

E Nohtrach zu [Holbox](https://goo.gl/maps/ixYv5hPzzu2qyN3i6) damit's hier mo weitergeht.

Was ma in da Mitte aach noch gemacht hann, war [Cenote][] zu besuche. Die gebt's in Mexiko zimmlich fill unn se sinn ach schon ganz cool.

Zwei hamma gesiehn unn in jeder schwimme genau die gleiche Fisch, so was klänes welsardiches mit lange Fühler unn vermutlich blind. Das merkt ma dodran, dass ma se recht leicht angedatscht kritt, bevor se sich dann ausm Staub mache. Odda macht sich e Fisch eher ausm Batsch?

[Bei der hier][map] gab's ach noch e klän Tropfsteinhöhl mit alte Maya-Artefakte.

[cenote]: https://www.wikiwand.com/de/Cenote
[map]: https://goo.gl/maps/EDCG7i7nDiUggeT8A

In [Ek Balam](https://goo.gl/maps/bn9Prp9Z8FoZ9zt88), nem Maya-Dörfche kläner als Mänzwiller hann ma drei Nächt im Dschungel gewohnt. Internet is seit dem zimmlich schlecht, awwa ich will wenichens vom Kakao berichte, den ma bei da Dorfältesten selbschd gemacht hann.

Mit de rohe Bohne hamma angefang, die sinn uffm Blech üwwa‘m Feier geröschd wor. Dann hamma se geschält unn uff nem große Stän gemahlen. Iss awwa eher so e ganz zähes Muß wor, weil do nadierlich die Kakaobutter drin iss. Das war zimmlich anstrengend unn ich muss mich bemühe, dass ma de Schweiß net vom Gesicht drufftroppst.

Als das no 20–30 min endlich ferdich war hat se enfach kochend Wasser druffgeschutt unn inngerührt. Bissje Zucker dezu unn ferdich war de natürlichste Kakao, den ich je getrunk hann.

Es Schätzelein mit Katzealergie konnt dem allerklänschde Wärmche do so wenich widerstehn wie em Kakao.

Noch e paar Inndrück von Playa del Carmen. Ach das Esse war so fein!

Awwa Nohmiddachs unn omends konnt ma sich amüsiere in dem Städche. Nadierlich totale Touristepreise und -anlockerei, awwa ma hann trotzdem richdich gudd gess unn Säft getrunk.

Was vegetarisch unn so angeht sinn se hier tatsächlich weiter als in Vancouver.

Enns von unsre Lieblingsdinger war [Ah Cacao](https://ahcacao.com/). Iss wohl e Minifranchise, das es nur in Cancún unn Playa del Carmen gebbt. Die mache so e geil Trinkschokolad (mir hann immer kalt getrunk) mit Bissje scharfem Maya-Gewärz – megagudd! Es war sogar wenicher sieß als die meischde Kaffees, die ma hier kritt hann. Oft ware se bappsieß, selbschd wenn ma se ohne Zucker bestellt hat. Wenn se dann werklich mo fastehn, dass ma __nix__ drin hann will, sinn se fassungslos.

Es Meer dort war aach ganz net. Net allzuviel Strand unn schon einiches an Betrieb, awwa wenn ma die Kamera in die richdich Richtung hallt…

So, muss jetzt hier mol was von Mexiko erzähle. So langsam iss jo kalt wor in Vancouver, also hamma uns verkrümelt.

Zeuerschd ganz abenteuerlich noh [Playa del Carmen](https://www.google.com/maps/place/Playa+del+Carmen,+Quintana+Roo/@20.6537884,-87.1068017,13z/data=!3m1!4b1!4m5!3m4!1s0x8f4e4323d22d4e61:0xe8c10b783bab4adc!8m2!3d20.6295586!4d-87.0738851), wo ich die erschd Woch awwa noch komplett remote geschafft hann.

War leider gar net so leicht, wenn ma komplett üwwamied iss, weil direkt gejeüwwa e Nachtclub unn e Karaoke-Bar um die Lautstärkehoheit kämpfe—bis 3 in die Naacht leider unn moins dann gleich weiter mim Presslufthammer. War net gudd für die Stimmung. Uff dem ledschde Foddo hotte ma noch kenn Ahnung.

De Johannes hat sich beschwert, dass ma zu weniche Gesichter hier sieht. Hat'er nadierlich recht, Gesichter sinn interessant.

So sieht ma hier dann beispielsweis Julia mit Bahareh, e Freundin vom Acro-Yoga odda ach mim [Curran](https://www.instagram.com/comfycarn/) hier ausm Haus.

Im Gruppebild sieht ma noch vier Arwidskolleeche von mir.

Ledschdens hamma krasser Newwel gehatt. Mir sinn quasi in da Wolke uffgewacht.

Endlich hamma's heit mol geschafft, noh Nord-Vancouver („Northvan“) ze fahre; unn zwar mim Seebus. Der fahrt [ganz bei uns in da Näh][fuss] los, koschd 2,50 $ unn braucht [knapp e Verdl Stunn enüwwa][meer].

Uff de anner Seit hat uns e Kolonn Cormorane empfang. Von soh nah hann ich die noch nie gesiehn.

Iss ganz scheen do im Norde, kommt ma alles e Bissje ruicher vor.

[fuss]: https://goo.gl/maps/YLV44qXmZyC4m8MD9
[meer]: https://goo.gl/maps/3T6ej3yETyLyJ9s89

Sichtbarkeitsverpeilungsrepost vom 12. November 2022

---

Nohdem mei Geboardsdaach am Samschdaach jo _so_ scheen sonnich war, ging's Sonndach e Bissje unn Mittwoch Naacht so richdich los mit Schnee.

Das war de fühschde Schneefall in Vancouver seit 70 Johr.

Hier in da Stadt war nadierlich alles schnell widda weg, awwa wemma jetzt Richdung Berje gugge, dann hann se schon weiße Käppcher.