Am Wochenenn hamma nommo e Wannerung gemacht. Die war werklich maximal, was ma sich als Deitscher unner Kanada so vorstellt.
Angefang hamma an nem [See][], wo ma im Kanu losgefahr sinn in e Flussarm rin unn hoch. Knapp unner na Stunn hat das wahrscheinlich gedauert. Ma ware awwa ach langsam, weil ma zwischedrin immer widda aussteije musste, weil ma uff Grund gelaaf sinn. Es war nämlich e Tidefluss, der grad ganz Ebbe war.
Herrlich war, dass unser neier Freund AJ seit Hund debei hott, der die ganz Fahrt lang am Ufer mit- bzw. vorausgewetzt iss.
Dann hamma's Kanu an Land gezerrt unn sinn zu Fuß weiter; erschd e Bissje Schotterweech awwa dann doll im Wald. Obwohl vor Bäre gewart wird, hamma leider kenn gesiehn.
Ziel war e richdich doller, reißender Fluss üwwa weiße Steine unn Kiesel. Dort hamma erschd mol Middach gemacht. Ab dann war uns die Sonn ach zugeneigt unn hat uns es kalte Wasser besser ertrahn losse. De AJ kannt e besonnerschd scheen Stell, wo ma e paar Meter ins Superblau springe kann, was gewisse Leit ausgiebich genutzt hann.
Die Wannerung – unn ich glaab speziell ach die Wassertemperatur – hann uns awwa _so platt_ gemacht. Ich hann's ball net geschafft für die Hemmfahrt wachzebleiwe.
